Kommunal medvirkning i forskning og innovasjon - sammendrag på samisk

Čoahkkáigeassu

Empiralaš publikašuvnnat sisttisdollet guorahallamiid, vásáhusaid ja bohtosiid suohkaniid ja dutkanbirrasiid ovttasbarggus innovašuvdnaprošeavttaid hárrái fuolahussuorggis. Dušše raporttat ja artihkkalat mat guoskkahit dutkan- ja innovašuvdnaovttasbarggu suohkaniiguin leat mielde čoahkkáigeasis. Raporttat ja artihkkalat mat dušše guoskkahit dutkamiid suohkanlaš fuolahusbálvalusaid innovašuvnna birra, eai leat mielde čoahkkáigeasus.

Diehtočoahkkáigeasu ulbmil

Ulbmil dáinna diehtočoahkkáigeasuin lea addit bajilgova relevánta njuolggadusain, dutkanprošeavttain ja vásáhusain suohkaniid rollas das ahte lágidit dilálašvuođaid dutkamii ja innovašuvdnii fuolahussuorggis ovttasráđiid dutkanbirrasiiguin. Deaŧalaš momeanta lea čalmmustahttit vejolašvuođaid ja hástalusaid dutkan- ja innovašuvdnaovttasbarggus suohkaniid fuolahusbálvalusa hárrái.

Eanet čuvget suohkaniid rolla dilálašvuođaid heiveheamis ja ovttasbargoguoibmin fuolahussuorggi dutkama ja innovašuvnna oktavuođas

Máŋggat guovddáš stuoradiggedieđáhusat ja almmolaš čielggadeamit lohket dutkanbirrasiid ja praksissuorggi ovttasbarggu innovašuvnna ja dutkama hárrái leat deaŧalaš gaskaoapmin dasa ahte ovdánahttit boahtteáiggi dearvvašvuođa- ja fuolahusbálvalusaid suohkaniin.

Norgga dutkanráđđi lea maŋemus jagiid deattuhan innovašuvnna almmolaš suorggis. Dutkanprográmmat ja regiovnnalaš dutkanfoanddat gáibidit dađistaga eambbo nana suohkanlaš searvama dutkanprošeavttaide ja ahte suohkaniin galgá leat ovddasvástádus dutkanruhtadeami ohcamiid hárrái.

Diehtočoahkkáigeasu váldogávdnosat

1. Mii gávdnat hui moadde publikašuvnna mat njuolga guoskkahit suohkaniid ja dutkanásahusaid dutkanovttasbarggu.
2. Publikašuvnnat válddahallet bohtosiid ja vásáhusaid innovašuvnnas mii lea álggahuvvon, ovdamearkka dihte váikkuhusaid ja ávkki maid ođđa teknologalaš čovdosat leat buktán.
3. Eanas innovašuvdna- ja dutkanovttasbargu publikašuvnnain mii váldojuvvo mielde čoahkkáigessui, lea čálgoortnetteknologiija birra ja bálvalusfállama ođđa modeallaid ja metodaid birra. 
4. Innovašuvdna- ja dutkanovttasbargu lea dávjá čadnon eksterna ruhtadeapmái mii lea juolluduvvon stuora našuvnnalaš innovašuvdnastrategiijaid oktavuođas, ovdamearkka dihte čálgoortnetteknologiijaprográmmii. 
5. Čuovvundutkan orru leame eanemus adnon metodalaš lahkonanvuohki dain innovašuvdna- ja dutkanovttasbargguin maid čoahkkáigeassu guoskkaha. 
6. Čuovvundutkamis leat goabbatlágan mearkkašupmi suohkaniid ja dutkanásahusaid rollas ovttasbarggus. Innovašuvdna- ja dutkanovttasbarggus lea dábálaš ahte dutkit loahpageahčen prošeavtta árvvoštallet dábálaš vuogi mielde dahje dakka maŋŋel go prošeakta lea loahpahuvvon. Suohkanat čilgejuvvojit doaibmat eambbo dilálašvuođaid lágideaddjin go aktiiva mieldutkin.

Dárbbašuvvojit eambbo dieđut

Girjjálašvuohta mii gávdno searvama birra dutkan- ja innovašuvdnaovttasbargui čájehe iešguđet vugiid dasa movt suohkanat sáhttet searvadahttojuvvot. Mii gávnnaimet unnán publikašuvnnaid prošeavttaid birra mat digaštallet innovašuvdna- ja dutkanovttasbarggu, nu go ovdamearkka dihte hehttejeaddji ja ovddideaddji beliid. Vai oččošeimmet eambbo ipmárdusa suohkaniid ja dutkanásahusaid dutkanovttasbarggus innovašuvnna birra, de dárbbašuvvo eambbo dokumentašuvdna dan hárrái movt dat čađahuvvo. Okta vejolaš čoavddus livččii ahte Norgga dutkanráđđi, regiovnnalaš dutkanfoanddat ja earát geat ruhtadit dutkama innovašuvnna birra suohkaniin almmuhivčče prošeavttaid mat guorahalaše dán áššečuolmma. Eará čoavddus livččii ahte dat bivddáše dokumentašuvnna elemeanttaid birra innovašuvdna- ja dutkanovttasbarggus mii dáhpáhuvvá dain prošeavttain maid sii ruhtadit.  Diekkár dokumentašuvdna dagašii vejolažžan ovdánahttit eambbo dieđu ulbmillaš rollačielggademiid, struktuvrraid ja innovašuvdna- ja dutkanovttasbarggu organiserema birra suohkaniin. Boahtte vuorus buvttášii dat eambbo innovašuvdna- ja dutkangelbbolašvuođa sihke suohkaniidda ja dutkanásahusaide.